Dende a súa posta en funcionamento en maio de 1997, A Unidade de Oncoloxía Radioterápica que xestiona Galaria no Hospital do Meixoeiro de Vigo tratou a máis de 40.000 pacientes, a maior parte dos cales recibiron terapia en aceleradores lineais da máis avanzada tecnoloxía. Este Servizo celebrou o pasado sábado día 27 de outubro de 2018 unha Xornada de Autoavaliación e Actualización, na que analizou todas as liñas de actividade que ten en marcha e puxo sobre a mesa as súas expectativas de futuro. Xunto coa participación dos seus propios profesionais, contou coa intervención de relatores de renome internacional, como o doutor Álvaro Martínez, xefe do Servizo de Oncoloxía Radioterápica do 21 st Century Oncology Center de Michigan, creador da radioterapia guiada por imaxe e iniciador da investigación en humanos dun estudo pioneiro sobre o tratamento do Alzheimer con radiacións. A raíz deste encontro científico xurdiu a posibilidade de que a Unidade de Oncoloxía Radioterápica colabore con ese centro norteamericano na liña de investigación do Alzheimer
O obxectivo fundamental deste encontro foi o de facer un repaso dos diferentes aspectos que constituíron o desenvolvemento desta unidade, desde unha óptica técnica, profesional e científica e ao mesmo tempo mostrar cara a onde quere camiñar este servizo, por iso é polo que convocase a relatores expertos en liñas tan innovadoras no campo da oncoloxía radioterápica como a terapia de protóns e os novos aceleradores provistos de resonancia magnética ou a aplicación da medicina xenómica no tratamento do cancro.
Neste último apartado, o da oncogenómica, contou coa presenza dos investigadores galegos Manuela Gago e Esteban Castelao, actualmente inmersos nun proxecto científico mundial de gran envergadura denominado Bridges, co obxectivo de lograr información xenética precisa de 50.000 mulleres para definir un algoritmo que permita medir a probabilidade que ten cada unha de padecer cancro de mama. Previamente, estes dous especialistas interviñeron noutro traballo, a través do Consorcio Galego do Cancro de Mama (Breogán), no que se manexaron mostras de 275.000 mulleres afectadas por esa enfermidade, dous mil das cales foron achegadas pola Unidade de Oncoloxía Radioterápica do Hospital do Meixoeiro.
Sobre a terapia de protóns, que é outra das liñas de futuro da radioterapia, falou, por unha banda, Marisa Ogando, directora xeral de Bioterra, empresa que representa en exclusiva para España á Compañía IBA, fabricante de equipos de terapia de protóns e á firma Raysearch, produtora de sistemas de planificación. Nesa mesmo apartado interviu José Ramón Sánchez, executivo en España de Mevion Medical Systems, fabricante de equipos de terapia de protóns, algúns dos cales poden ser adaptables a unha unidade de radioterapia convencional, e Jaime Gutiérrez de Calderón, director xeral de Varian Medical System Iberica, empresa que tamén fabrica ese tipo de equipamento.
O programa da Xornada de Autoavaliación incluíu outros apartados sobre investigación, radiofísica, radiocirurxía ou o uso da radioterapia na neuralxia de trixémino, así como mesas especificas para médicos, radiofísicos, psicóloga, técnicos, administrativos ou de satisfacción de usuarios.