A Unidade de Oncoloxía Radioterápica do Hospital do Meixoeiro acaba de incorporar á súa dotación tecnolóxica un moderno equipo de braquiterapia de alta taxa, que substitúe ao que viña utilizando ata o de agora e que representa un considerable avance na rapidez e seguridade deste tipo de tratamentos contra o cancro. A braquiterapia é un sistema de tratamento con radiacións que permite levar as fontes radioactivas ata o interior do tumor ou situalas moi próximas ao mesmo, polo que se poden aplicar doses elevadas no volume para tratar minimizando o risco para os órganos e tecidos sans do ao redor.