O Servizo de Medicina Nuclear é un servizo clínico que lles presta atención sanitaria e técnica a doentes con patoloxía oncolóxica, cardiolóxica, endocrinolóxica, neurolóxica, nefrolóxica, urolóxica, ósea e doutras especialidades. Entre os seus obxectivos figura a aplicación de todos aqueles avances que permiten a tecnoloxía de medicina nuclear dispoñible para a realización de diferentes probas encamiñadas a acadar a maior cantidade de información sobre o proceso dos pacientes ou ben para a aplicación de terapias dirixidas a unha diana biolóxica concreta. Traballa en colaboración cos servizos de cardioloxía e radiodiagnóstico para a realización conxunta de determinadas probas diagnósticas, así como coa sección de radioloxía vascular para certas terapias.
A unidade iniciou a súa actividade no hospital do Meixoeiro no ano 1996 prestando servizo en xornada de tarde nas mesmas instalacións que o servizo xa existente no hospital. No ano 2002 constituíuse a área de servizo compartido de Medicina Nuclear do Hospital do Meixoeiro, ao dispoñer de dúas unidades de xestión diferenciadas, con persoal adscrito a cadansúa, unha dependente do CHUVI (Complexo Hospitalario Universitario de Vigo) e outra do antigo Instituto Galego de Medicina Técnica, que compartían instalacións e espazos físicos, carteira de servizos única, así como programación e citación compartida independente da área xeográfica de orixe ou exploración solicitada, e con parte do persoal realizando a súa actividade en ambas quendas, independentemente da súa adscrición laboral. Esta situación coma área de servizo compartido perdura a data de hoxe, estendéndose á área de PET, non incluída inicialmente. Así mesmo, compártense as terapias polos facultativos das dúas quendas na Unidade Metabólica, pese a que a xestión depende de Galaria.
A unidade foi renovando e ampliando os seus recursos técnicos ata a dotación actual na que se integran tres gammacámaras SPECT/CT de última xeración, unha sala de ergometrías, equipo para captación tiroidea , un equipo PET-CT dixital con CT de 128 cortes e unha área de terapia metabólica con tres habitacións radioprotexidas para o tratamento do cancro de tiroide con Iodo-131 y outras terapias no marco da teragnose (que combina terapia e diagnóstico).
En canto aos espazos físicos, conta con salas de agarda diferenciadas para pacientes non inxectados, pacientes inxectados adultos, pacientes inxectados pediátricos, pacientes ingresados e cinco boxes individuais para pacientes inxectados con radiofármacos PET e sala de espera para familiares de PET e M.N. A chamada faise a través de pantallas de aviso para o PET e M.N.
Así mesmo, o servizo dispón dunha instalación radiactiva autorizada na Unidade de Radioloxía Intervencionista do Hospital Álvaro Cunqueiro, que lle permite realizar novidosos tratamentos baseados en micro-esferas de Itrio-90.